makara ankranthi 2018

ఈ తేదీల్లోనే.. సంక్రాంతి ఎందుకు?

సంక్రాంతి పండుగ పిల్లలకు ఇష్టమైన పండుగ… భారతదేశమంతా జరిగే వేడుక… రివ్వున ఎగిరే గాలిపటాలు… కమ్మకమ్మని పిండి వంటలు… అందమైన ముగ్గులు… డూడూ బసవన్నలు… అన్నీ కలిస్తే… అదే సంక్రాంతి పండుగ. ఇదంటే శాన్వికి ఎంతో ఇష్టమట. అయితే సంక్రాంతి ఎందుకు చేస్తారు? ఇది మాత్రం ఒకే తేదీన ఎందుకు వస్తుందంటూ బోలెడు సందేహాలున్నాయట. అవన్నీ వాళ్లమ్మని అడుగుతానంటూ పరుగులు తీసింది. మరి వాళ్లిద్దరి మధ్య జరిగిన సంభాషణ ఏంటో? మనమూ తెలుసుకుందామా!

శాన్వి : అమ్మా! నాకు అన్ని పండుగ సెలవులకన్నా సంక్రాంతి సెలవులంటే చాలా ఇష్టం…
అమ్మ: ఎందుకు?
శాన్వి : చక్కగా ఇంటి నిండా ముగ్గులు పెట్టేస్తావూ… మాకు నచ్చిన కమ్మని వంటలన్నీ వండేస్తావూ. ఇంకా తాతయ్య దగ్గరుండి గాలిపటం చేసిచ్చి పొద్దున్నుంచి మాతోపాటే సరదాగా గడుపుతారు. బసవన్నల్ని చక్కగా అలంకరించి తీసుకొస్తారు. పట్టణాల్లో చదువుకుంటున్న నా స్నేహితులు కూడా వచ్చేసి నాతో ఆడుకుంటారు. ఇదంతా భలే సందడిగా ఉంటుంది కదమ్మా అందుకే. ఇది సరే కానీ.. పొద్దున తాతయ్య ఫోన్లో మాట్లాడుతూ బాబాయ్‌తో ‘ఇది అసలే పెద్ద పండుగ నువ్వు తప్పకుండా రావాల్సిందే’ అంటున్నాడు. పెద్ద పండుగంటే ఏంటమ్మా?
అమ్మ: అదా… ఇది ముఖ్యంగా రైతుల పండుగ. పంటచేతి కొచ్చే రోజుల్లో సంతోషంగా చేసుకుంటారు అందుకే పెద్ద పండుగ అని పిలుస్తారన్నమాట.
అన్వి: అలాగా…! మరి మకర సంక్రాంతి అని ఎందుకంటారు?
అమ్మ: భలే సందేహాలే వచ్చాయే.. కాస్త జాగ్రత్తగా విను… సంక్రాంతి అంటే సంక్రమణము. అంటే మారడం అని అర్థం. అయితే మనకు పన్నెండు రాశులున్నాయి కదా. వాటిల్లో సూర్యుడు మకరరాశిలో ప్రవేశించేది ఈరోజే కాబట్టి ఆ పేరు. దీని మరో ప్రత్యేకత ఏమిటంటే.. ఏడాది కాలంలో ఆరు నెలలు ఉత్తరాయణమని, ఆరు నెలలు దక్షిణాయణమని అంటారు. దేవతలకు ఉత్తరాయణం పగలైతే, దక్షిణాయణం రాత్రి అని భావిస్తారు. సంక్రాంతి రోజు నుంచే ఉత్తరాయణం ప్రారంభమవుతుంది కాబట్టే ఈ పండగకి మరింత ప్రాధాన్యత.
శాన్వి : అవునమ్మా… మరి ఉగాది… దసరా.. దీపావళి… ఇలా మన పండుగలన్నీ వేరే వేరే తేదీల్లో వస్తుంటాయి? మరి ఇది మాత్రం జనవరి 14నో 15నో వస్తుందేం?
అమ్మ: బాగానే గుర్తుపట్టావే. పండుగల్లో సంక్రాంతి మాత్రమే సౌర గమనాన్ని అనుసరించి వస్తుంది. మనం అనుసరించే గ్రెగోరియన్‌ క్యాలెండర్‌ కూడా సౌరమానాన్ని అనుసరిస్తుంది కనుక సంక్రాంతి ఏటా ఇంచుమించు ఒకే తేదీన వస్తుంది. మిగిలిన పండుగలన్నీ భారతీయ సంప్రదాయం ప్రకారం చాంద్రమానాన్ని అనుసరించి వస్తాయి. అందుకే గ్రెగోరియన్‌ క్యాలెండర్‌ ప్రకారం వేరు వేరు తేదీల్లో వస్తాయన్నమాట.
శాన్వి : అదా అసలు విషయం! నీకో సంగతి చెప్పడం మరిచా.. పొద్దున మేమంతా గాలిపటాలు ఎగరేస్తుంటే అందరి కన్నా నేనే పైకి ఎగరేశా. భలే ఆనందంగా అనిపించింది తెలుసా?
అమ్మ: ఆనందమే కాదు… గాలిపటాలు ఎగరవేసే ఆనవాయితీ వెనుక మంచి కారణం కూడా దాగి ఉంది. ఈ సమయంలో పొద్దున్నే సూర్యకిరణాలు శరీరానికి తాకితే మంచిదట. ఎన్నో బాక్టీరియాలు, క్రిములు సూర్య కిరణాలతో నశిస్తాయి. ఆనందంతో పాటు ఆరోగ్యం కూడా సొంతం చేసుకోవచ్చనే ఉద్దేశంతో ఈ పండుగ రోజున గాలిపటాలు ఎగరేయడం మొదలుపెట్టారు.
శాన్వి : అయితే రేపు కూడా పొద్దున్నే లేచి మరిచిపోకుండా ఎగరేస్తా. మనమేమో భోగి, సంక్రాంతి, కనుమ అంటూ మూడు రోజులు చేసుకుంటాం. కానీ మా స్కూల్లో కొత్తగా వచ్చిన ఛార్మి దీన్నే లోహ్రీ అంటారని చెప్పింది.
అమ్మ: అవునమ్మా… మీ ఫ్రెండ్‌ది పంజాబ్‌ అనుకుంటా. వాళ్లే అలా పిలుస్తారు. భోగి మంటలు పెట్టి భాంగ్రా నృత్యాలు చేస్తారు. ఇలా మనదేశంలో ఒక్కోచోట ఒక్కోలా చేసుకుంటారు. కర్ణాటకలో ఈరోజున చెరకు గడలను ఇచ్చి పుచ్చుకుని శుభాకాంక్షలు చెప్పుకొంటారు. అసోంలో భోగలి బిహు, తమిళనాడులో పొంగల్‌ అంటారు. అంతేకాదు… నేపాల్‌లో మాఘే సంక్రాంతి, థాయ్‌లాండ్‌లో సోంగ్‌క్రన్‌, మయన్మార్‌లో థింగ్‌యన్‌ పేర్లతో ఈ పండుగను జరుపుతారు. మిఠాయిలు, నెయ్యి, బంగాళాదుంపలు పంచుకుంటారు.
శాన్వి : నువ్వు చెప్పిన కబుర్లన్నీ చిట్ట¨, చిన్నూ, బన్నిలకు చెప్పాలి నేను మళ్లీ వస్తానే…
అమ్మ: ఇదిగో అరిసెలు తీసుకెళ్లి నీ స్నేహితులకు సంక్రాంతి శుభాకాంక్షలు చెప్పు….
శాన్వి : అ…లా…గే అమ్మా!

Leave a Comment