Thursday, 23 May 2013 06:18

కావలసిన పదార్థాలు :
బాస్మతి బియ్యం - ఒక గ్లాసు
ఉల్లిపాయలు - 50గ్రా.
మిరియాలు - ఒక స్పూను
లవంగాలు - ఎనిమిది
పంచదార - చెంచా
నెయ్యి - 75గ్రా.
దాల్చినచెక్క - నాలుగు ముక్కలు
నల్ల యాలకులు - ఆరు
ఉప్పు - తగినంత
జీడిపప్పు - ఆరు పలుకులు

తయారీ విధానం :
ముందుగా కుక్కర్లో పంచదార వేసి వేయించాలి. తర్వాత అందులో నెయ్యి వెయ్యాలి. ఇది మరుగుతుండగా లవంగాలు, నల్లయాలకులు, మిరియాలు, దాల్చినచెక్క వేసి వేగాక ఉల్లిపాయ తరగు వేసి బాగా వేయించాలి. ఇందులోనే కడిగిన బాస్మతిబియ్యం వేసి వేయించాలి. బియ్యానికి రెండింతల నీళ్లు పోసి, తగినంత ఉప్పు వేసి మూత పెట్టాలి. మూడు విజిల్స్ వచ్చిన తర్వాత దించాలి. అంతే పార్శీ రైస్ రెడీ.

- పి. రాజామణి, విజయవాడ, కృష్ణాజిల్లా

పైనాపిల్ రైస్

సాధారణంగా ఎవరైనా పైనాపిల్‌ను ముక్కలు కోసిగాని, లేదంటే జ్యూస్ చేసుకుని గాని తింటారు. కానీ దీంతో స్వీట్ చేసుకుని తింటే ఎంతో రుచిగా ఉంటుంది. ఇది చెయ్యడానికి కూడా ఎక్కువ సమయం పట్టదు. తక్కువ టైంలోనే తయారయ్యే పైనాపిల్ రైస్ ఎంతో రుచిగా ఉంటుంది.

కావలసిన పదార్థాలు :
బాస్మతి బియ్యం - పావు కిలో, పంచదార - 2 కప్పులు, పైనాపిల్ - ఒకటి, నెయ్యి - పావు కప్పు, జీడిపప్పు, కిస్‌మిస్, ఎండు ద్రాక్ష - పావుకప్పు.

తయారీ విధానం :
ముందుగా బాస్మతి బియ్యంతో పొడిపొడిగా ఉండేట్టు అన్నం వండుకుని పక్కన పెట్టుకోవాలి. పైనాపిల్ పండును తొక్క తీసి తురిమి ముద్దచేసి రసంతో సహా ఓ గిన్నెలో ఉంచుకోవాలి. ఇప్పుడీ ముద్దను చక్కెరతో కలిపి ఓ నాన్‌స్టిక్ మూకుడులో వేసి ఉడికించుకోవాలి. ఇలా చేస్తున్నప్పుడు మొదట నీళ్లులాగా అయి కాసేపటికి చిక్కగా అవుతుంది. ఇప్పుడు అందులో ఉడికించి పెట్టుకున్న అన్నాన్ని వేసి శుభ్రంగా కలిపి నెయ్యి వెయ్యాలి. చివరగా వేయించిన జీడిపప్పు, కిస్‌మిస్ పలుకులు వేసి మళ్లా కలిపి కాస్త కుంకుమ పువ్వును పాలల్లో కలిపి చల్లితే పైనపిల్ రైస్ సిద్ధమవుతుంది.

- రత్నా మహీధర్, హిమాయత్‌నగర్, హైదరాబాద్

క్యాసో బిర్యాని

కావలసిన పదార్థాలు :
బియ్యం- 300గ్రా, సొరకాయ- 100గ్రా, క్యారెట్-2, లవంగం-1, యాలకులు- తగినంత, చెక్క- చిన్నముక్క, జీలకర్ర- పావు చెంచా, అనాసపువ్వు- చిన్నముక్క, నెయ్యి- 1చెంచా, నూనె- 1చెంచా, బగార ఆకులు-2, కరివేపాకు- సరిపడా, కొత్తిమీర- చిన్నకట్ట, పచ్చిమిరపకాయలు-3, ఉల్లిపాయలు-1, అల్లం వెల్లుల్లి పేస్ట్- 1 చెంచా

తయారీ విధానం :
బియ్యం ముందుగా అరగంట సేపు నానబెట్టుకోవాలి. ఒక గిన్నెలో నూనె వేసిన తర్వాత లవంగం, దాల్చిన చెక్క, అనాసపువ్వు, యాలకులు, జీలకర్ర, బగారా ఆకు వేసి వేయించాలి. తర్వాత క్యారట్, సొరకాయ, ఉల్లిపాయ, పచ్చిమిర్చి, కరివేపాకు, అల్లంవెల్లుల్లి పేస్ట్ వేసి వేయించాలి. ఇప్పుడు నానిన బియ్యాన్ని స్టౌపై ఉడికించాలి. తర్వాత పై మిశ్రమాన్ని, కొత్తిమీర అన్నంలో కలపి సన్నని మంటపై కొంచెంసేపు ఉంచి దించేయాలి. దాంతో క్యాసో బిర్యానీ రెడీ అయినట్లే. దీనికి క్యారట్ ముక్కలు, కొత్తిమీరతో గార్నిష్ చేసి వడ్డిస్తే సరి.

- టి.పద్మావతి, ఆదిలాబాద్

పంచపప్పుల రైస్

కావలసిన పదార్థాలు :
బియ్యం - 3 కప్పులు
పెసరపప్పు - అర కప్పు
కందిపప్పు - అరకప్పు
శెనగపప్పు - అర కప్పు
నెయ్యి - 100గ్రా
మిరియాలు - చెంచా
జీలకర్ర - చెంచా
జీడిపప్పు - 25గ్రా
ఉప్పు - తగినంత
కరివేపాకు - నాలుగు రెబ్బలు
కొత్తిమీర - కట్ట
పాలు - గ్లాసు

తయారీ విధానం :
కుక్కర్లో నెయ్యి వేసి బాగా కాగాక జీడిపప్పు, జీలకర్ర వేయించి, కడిగిన బియ్యం, పప్పులు కూడా వేసి వాటికి రెండింతలు నీళ్లు పోసి, తగినంత ఉప్పు, పాలు పోసి మూత పెట్టాలి. మూడు విజిల్స్ వచ్చిన తర్వాత దించేయాలి. చల్లారిన తర్వాత మూత తీసి గరిటతో బాగా కలిపి కొత్తిమీరతో అలంకరించుకోవాలి. అంతే పంచపప్పుల రైస్ రెడీ.

- కె. శ్రీదేవి, తిరుపతి.

రొయ్యల క్రీమీ బిర్యానీ

కావలసిన పదార్థాలు :
రొయ్యలు - అరకిలో, ఉల్లిపాయలు - 4
పచ్చిమిర్చి - 4, బియ్యం - అరకిలో
నూనె - 4 చెంచాలు, నెయ్యి లేదా డాల్డా - 100గ్రా., అల్లం వెల్లుల్లి పేస్ట్ - 2చెంచాలు,
నీళ్లు - 4గ్లాసులు, దాల్చిన చెక్క - చిన్నవి 2,
లవంగాలు - 5, యాలకులు - 5
మరాఠి మొగ్గలు - 5, బిర్యాని ఆకులు - 4
జాజికాయ - 1, పెరుగు - రెండు కప్పులు

పొడి చేసుకోవడానికి : జాపత్రి - పావు తులం, యాలకులు - పావు తులం, లవంగాలు - పావు తులం, దాల్చిన చెక్క - పావు తులం, ఉప్పు - చిటికెడు కారం - చిటికెడు, పసుపు - చిటికెడు.

తయారీ విధానం :
ముందుగా రొయ్యలను శుభ్రం చేసుకోవాలి. నీరు లేకుండా చేసి అందులో చిటికెడు ఉప్పు, కారం, పసుపు వేసి కలుపుకోవాలి. తరువాత సన్నని మంట మీద పది నిమిషాలు ఉంచి దించేయాలి. రొయ్యల లోని నీరు బయటకు వచ్చాక రెండిటినీ వేరుచేయాలి. అలాగే బియ్యాన్ని కడిగి నీరు లేకుండా ఆరబెట్టాలి. తరువాత సన్నని మంటపై ఓ బాణలిపెట్టి అందులో నూనె వేసి కాగిన తరువాత కట్‌చేసి పెట్టుకున్న ఉల్లి, పచ్చిమిరపకాయల ముక్కలను వేయాలి. ఇవి కాస్త వేగిన తరువాత దాల్చిన చెక్క, లవంగాలు, యాలకులు, మరాఠి మొగ్గ, బిర్యాని ఆకు వేయాలి. ఇవి వేసిన రెండు నిమిషాల తరువాత అల్లం, వెల్లుల్లి పేస్ట్ వేసి అడుగు అంటకుండా ఉండేందుకు నెయ్యి వేయాలి. ఇప్పుడు రొయ్యలని రెండు భాగాలు చేసి అందులో ఒక భాగాన్ని బాణలిలో వేసి నాలుగు గ్లాసుల నీళ్లు పోసి, ఉప్పు వెయ్యాలి. ఈ నీళ్లు మరుగుతుండగా ఉప్పును సరిచూసుకొని యాలకులు, జాజిపత్రి, లవంగాలు...తో చేసి పెట్టుకున్న పొడిని ఒక చెంచా మరుగుతున్న నీళ్లలో వేయాలి. తరువాత అందులో బియ్యాన్ని వేయాలి. అనంతరం రెండో భాగం రొయ్యలను పైన వేసి చుట్టూ సర్దుకుని ఆవిరిపోకుండా మూత పెట్టి మరో పదిహేను నిమిషాలు ఉంచితే సరి. ఘుమఘుమలాడే రొయ్యల క్రీమీ బిర్యాని సిద్ధం అవుతుంది. దీనికి కాస్త ఉల్లి-పెరుగు జోడిస్తే యమా టేస్టీగా ఉంటుంది.

- గంగుమళ్ల లక్ష్మీకనకదుర్గ, కోటవీధి,
రామచంద్రపురం, తూర్పుగోదావరి జిల్లా

క్యాప్సికమ్ రైస్

కావలసిన పదార్థాలు :
బియ్యం - కప్పు
క్యాప్సికం - 3
ఎండు మిరపకాయలు - 2
ఆవాలు - చెంచా
మినప్పప్పు - 3 చెంచాలు
శనగపప్పు - 3 చెంచాలు
ధనియాలు - చెంచా
పసుపు - అరచెంచా
దాల్చిన చెక్క - చిన్నది
ఉప్పు, నూనె - తగినంత

తయారీ విధానం :
ముందుగా అన్నం వండి పెట్టుకోవాలి. ఎండు మిరపకాయలు, దాల్చిన చెక్కలను వేర్వేరుగా గ్రైండ్ చేసుకుని పెట్టుకోవాలి. ఇప్పుడో బాణలిలో నూనె వేసి కాగిన తర్వాత ఆవాలు, శనగపప్పు, క్యాప్సికం ముక్కలను వేయాలి. ఇవి వేగిన తరువాత మంట తగ్గించి పసుపు, ఉప్పు, మిరప, దాల్చిన చెక్క పొడులను వేసి బాగా కలపాలి. మరో ఐదు నిమిషాల తర్వాత అన్నాన్ని వేసి బాగా కలిపి దించుకోవాలి. పైన కాస్త నెయ్యి చల్లుకుంటే సరి. నోరూరించే క్యాప్సికం రైస్ రెడీ.

- పంపినవారు పేరు రాయలేదు

వెజిటబుల్ పులిహోర

కావలసిన పదార్థాలు :
క్యారెట్ ముక్కలు- 1కప్పు, బంగాళాదుంప ముక్కలు- 1కప్పు, క్యాప్సికమ్ ముక్కలు- అర కప్పు, దొండకాయలు-3, బీట్‌రూట్, క్యాబేజీ, పచ్చిబఠానీ, బీన్స్- 2 కప్పులు, పచ్చిమిరపకాయలు- 4, ఎండు మిరపకాయలు-4, ఇంగువ- చిటికెడు, పచ్చిసెనగపప్పు,- 2 చెంచాలు, పల్లీలు, మిరియాల పొడి, పసుసు, ఉప్పు- తగినంత, బియ్యం- అర కిలో

తయారీ విధానం :
ముందుగా బియ్యాన్ని కడిగి దానికి అన్ని కూరగాయల ముక్కలను కలిపి పొడిగా ఉండే విధంగా వండాలి. తర్వాత ఆ అన్నాన్ని వెడల్పాటి పాత్రలోకి తీసుకుని పుసుపు, ఉప్పు, మిరియాల పొడి, నిమ్మరసం, నూనె కలపాలి. తర్వాత తాలింపు వేసి ఈ అన్నానికి కలిపితే పులిహోర రెడీ అయినట్లే.

-ఎమ్.మాధవి, జగ్గయ్యపేట

పుదీనా - రాజ్మా బిర్యాని

కావలసిన పదార్థాలు :
బియ్యం - కేజీ
పుదీనా - నాలుగు కట్టలు
రాజ్మా గింజలు - 200 గ్రా
అల్లం వెల్లుల్లి పేస్టు - రెండు టేబుల్ స్పూన్లు
ఉల్లిపాయ - ఒకటి
పచ్చిమిరపకాయలు - ఆరు
నూనె - 100గ్రా
నెయ్యి - 100గ్రా
లవంగాలు - 6
దాల్చినచెక్క - చిన్న ముక్కలు నాలుగు
ఉప్పు - తగినంత

తయారీ విధానం :
ముందురోజు రాత్రి రాజ్మా గింజల్ని నానబెట్టాలి. బిర్యానీ తయారు చేయడానికి ముందు బియ్యాన్ని కడిగి పెట్టుకోవాలి. కాడలు లేకుండా పుదీనా ఆకులను తుంచి శుభ్రంగా కడిగి గ్రైండ్ చేసుకోవాలి. వెడల్పుగా ఉన్న గిన్నెలో నూనె, నెయ్యి వేసి కాగిన తర్వాత లవంగాలు, దాల్చినచెక్క వేసి వేయించాలి. తర్వాత ఉల్లిపాయ ముక్కలు, పచ్చిమిర్చి ముక్కలు, రాజ్మాగింజలు, అల్లంవెల్లుల్లి పేస్టు వేసి కాస్త మగ్గనివ్వాలి. ఇప్పుడు పుదీనా పేస్టు వేసి దోరగా వేయించి తగినంత నీరు పోసి ఉప్పు వేయాలి. నీళ్లు మరిగిన తరువాత బియ్యం వేసి ఉడకనివ్వాలి. అంతే పుదీనా - రాజ్మా బిర్యానీ రెడీ అయినట్లే.

- వూర విజయలక్ష్మి, కనుపర్తి, ప్రకాశం

ఎగ్ వెజిటబుల్ ఫ్రైడ్‌రైస్

కావలసిన పదార్థాలు :
కోడిగుడ్లు - రెండు, బియ్యం - అరకిలో
క్యారెట్ ముక్కలు - అరకప్పు, బీన్స్ ముక్కలు - అర కప్పు
పచ్చిబఠాణీలు - అరకప్పు, పచ్చిమిరపకాయలు - రెండు
సోయాసాస్ - చెంచా, టమోటాసాస్ - చెంచా
అజినోమోటో - చెంచా, ఉప్పు - తగినంత
కారం - చెంచా, మిరియాలపొడి - అరచెంచా
కొత్తిమీర తురుము - అర కప్పు, నూనె - తగినంత

తయారీ విధానం :
ముందుగా అన్నం వండి పక్కన పెట్టుకోవాలి. తర్వాత బాణలిలో కొంచెం నూనె వేయాలి. నూనె వేడి అయిన తర్వాత కోడి గుడ్లు కొట్టి వేసి బాగా కలియబెట్టాలి. తర్వాత క్యారెట్, బీన్స్, బఠాణీలు, పచ్చిమిరపకాయ ముక్కలు వేసి కొంచెం మగ్గనివ్వాలి. అందులో సోయాసాస్ వేసి బాగా కలపాలి. తర్వాత అందులో అన్నం వేసి అజనొమోటో, టమాటాసాస్, సోయాసాస్, ఉప్పు, కారం, మిరియాలపొడి వేసి బాగా కలపాలి. చివరికి సన్నగా తరిగిన కొత్తిమీర చల్లితే వేడి వేడి ఎగ్ వెజిటబుల్ బిర్యాని రెడీ.

- వి. పద్మశ్రీ, శ్రీరాంపూర్, మంచిర్యాల

పెసరపునుకుల బిర్యానీ

కావలసిన పదార్థాలు :
పెసరపప్పు - 159 గ్రా
బాస్మతి బియ్యం - అరకిలో
యాలకులు - 4, లవంగాలు - 8
దాల్చినచెక్క - రెండు ముక్కలు
బిర్యాని ఆకులు - రెండు
సాజీరా - చెంచా
అల్లంవెల్లుల్లి పేస్టు - రెండు చెంచాలు
ఉల్లిపాయ - ఒకటి
పచ్చిమిరపకాయలు - 8
కొత్తిమీర - కట్ట, పుదీనా - కట్ట
నూనె - సరిపడా
నెయ్యి - చెంచా
ఉప్పు - తగినంత
నీళ్లు - సరిపడా

తయారీ విధానం :
పెసరపప్పును రెండు గంటల ముందు నానబెట్టాలి. నానిన పప్పును కొంచెం బరకగా రుబ్బుకుని కొంచెం ఉప్పు కలుపుకోవాలి. బాణలిలో నూనె పోసి కాగిన తర్వాత రుబ్బిపెట్టుకున్న పెసరపిండిని చిన్న చిన్న పునుకులుగా వేసి వేయించుకోవాలి. తర్వాత బాస్మతి బియాన్ని కడిగి పది నిమిషాలు నానబెట్టుకోవాలి. ఇప్పుడు మందపాటి గిన్నెలో నెయ్యి, నూనె పోసి కాగిన తర్వాత లవంగాలు, సాజీరా, యాలకులు, దాల్చినచెక్క, బిర్యానిఆకు, పచ్చిమిరపకాయ ముక్కలు, ఉల్లిపాయ ముక్కలు వేసి దోరగా వేయించుకోవాలి. తర్వాత అల్లం వెల్లుల్లి పేస్టు, పుదీనా వేసి వేగిన తర్వాత కడిగి ఆరబెట్టుకున్న బియ్యాన్ని రెండు నిమిషాలు వేయించి, బియ్యానికి రెండు రెట్లు నీరు పోయాలి. సరిపడా ఉప్పు వేసి కలిపి మూత పెట్టాలి. సగం ఉడికిన తర్వాత వేయించి పెట్టుకున్న పునుకులు, కొత్తిమీర వేసి కలిపి ఆవిరి పోకుండా మూతపెట్టి సన్నటి సెగపై ఇరవై నిమిషాల పాటు ఉడికించాలి. అంతే పెసర పునుకుల బిర్యాని సిద్ధం.

- ఎస్. సుజాత, భీమవరం, పశ్చిమగోదావరి జిల్లా

* ప్రపంచంలోని కార్లు, ట్రక్కులు, విమానాలు, నౌకలు వంటి ప్రయాణ సాధనాలన్నిటికన్నా మాంసం పరిశ్రమ విడుదల చేస్తున్న గ్రీన్‌హౌస్ వాయువుల ఉద్గారం ఎక్కువని 2006 ఐరాస నివేదికలోని అధ్యయనం ఒకటి స్పష్టం చేస్తోంది. పర్యావరణాన్ని పరిరక్షించాలంటే శాకాహారులుగా మారడం మంచి మార్గమని అది సూచించింది.

* చింతపండు, నిమ్మరసం వంటి పదార్థాలతో చేసే పుల్లటి వంటకాలను నాన్‌స్టిక్ పాత్రల్లో వండితే వాటి కోటింగ్ త్వరగా దెబ్బతినే అవకాశం ఉంది.

* పంచదార డబ్బాలో ఒకటిరెండు వెల్లుల్లి రెబ్బలు వేస్తే చీమలు పట్టవు.

* వేడినీటిలో పదిహేను నిమిషాల పాటు ఉంచిన నిమ్మకాయలు ఎక్కువ రసాన్నిస్తాయి.

* డైనింగ్ టేబుల్ మీద పెట్టే చిన్నచిన్న ఉప్పు పెప్పర్ సీసాల్లో బియ్యం గింజలు వేస్తే అవి ఉండకట్టకుండా సాఫీగా జారతాయి

Thursday, 23 May 2013 06:18

అరటిపువ్వు పులుసు కూర

కావలసిన పదార్థాలు :
అరటిపువ్వు - పెద్దది, చింతపండు - 50గ్రా,
ఉల్లిపాయలు - 4 పెద్దవి, పచ్చి మిరపకాయలు - 6, తాలింపు సామాన్లు - రెండుచెంచాలు, ఇంగువ - చిటికెడు ఆవకోసం :
ఆవాలు - చెంచా, ఎండు మిరపకాయలు - 2
తెల్ల నువ్వుల పప్పు - 3 చెంచాలు, నూనె - తగినంత, ఉప్పు - తగినంత, పసుపు - చిటికెడు.

తయారీ విధానం :
అరటిపువ్వును ఒలిచి పువ్వులో రేకులను (వీటిని దొంగలు అని అంటారు. మొగ్గల్లా ఉంటాయి) తొలగించి శుభ్రం చేసుకోవాలి. అలా శుభ్రం చేసుకున్న పువ్వులన్నింటిని రోటిలో గాని మిక్సిలో గాని వేసి కచ్చా, పచ్చాగా దంపుకుని జల్లెడలో వేసి నీళ్లతో బాగా శుభ్రం చేసుకోవాలి. ఇలా చేయడం వల్ల పువ్వుకున్న వగరు పోతుంది. తరువాత ఓ బాణలిలో నూనె పోసి ఇంగువ, తాలింపు సామాన్లు వేసి వేగిన తర్వాత ఉల్లిపాయ, పచ్చిమి్చి ముక్కలు వేసి వేగిన తరువాత దంపుకున్న అరటిపువ్వును కూడా చేర్చి ఉప్పు వేసి మగ్గనివ్వాలి. అరటిపువ్వు కొంచెం మగ్గిన తర్వాత చింతపండు పులుసు పిసికి పోయాలి. పులుసు బాగా అరటిపువ్వుకి పట్టి నీరు ఇగిరేవరకు ఉడికించాలి. దీంతో కూర తయారవుతుంది. తరువాత ఆవాలు, నువ్వుల పప్పు, రెండు ఎండుమిర్చి, ఉప్పు మిక్సీలో వేసి కొద్దిగా నీరు పోసి పోపు ముద్దలా చేయాలి. ఈ మిశ్రమాన్ని చల్లారిన అరటిపువ్వు కూరకి కొద్దిగా నూనె వేసి కలపాలి. అంతే కమ్మని పులుసుతో అరటిపువ్వు కూర రెడీ అవుతుంది.

- జి. శైలజ, జంగారెడ్డి గూడెం, పశ్చిమ గోదావరి

అరటికాయ కోఫ్తా కర్రీ

కావలసిన పదార్థాలు :
అరటికాయలు - 4, ఉల్లిపాయలు - 3, టమోటాలు - పావు కిలో, అల్లం వెల్లుల్లి పేస్ట్ - 3 చెంచాలు, పచ్చిమిరపకాయలు - 6, కొత్తిమీర - కట్ట, మిరియాల పొడి - అర చెంచా, పెరుగు - కప్పు, ధనియాల పొడి - చెంచా, జీడిపప్పు - 50గ్రా, ఉప్పు - తగినంత, నూనె - వేయించడానికి సరిపడ, పసుపు - చిటికెడు, కారం - రెండు చెంచాలు, కొత్తిమీర - కట్ట, పుదీనా - కట్ట, గరం మసాల - అరచెంచా, కొబ్బరి పొడి - చెంచా.

తయారీ విధానం :
అరటికాయలను ఉడికించి పై చెక్కు తీసి మెత్తని పేస్టులా చేసుకోవాలి. బాణలిలో నూనె పోసి వేగాక ఉల్లిపాయముక్కలు, పచ్చిమిర్చి, కొత్తిమీర కొంచెం వేయించి అందులో ఉప్పు, మిరియాల పొడి వేసి కలపాలి. ఆ మిశ్రమంలో జీడిపప్పు పేస్టును కూడా వేసి కలపి ఉండలుగా చేసుకోవాలి. ఈ ఉండలను డీప్ ఫ్రై చేసుకోవాలి. తర్వాత ఒక పాత్రలో నూనె పోసి పోపు వేసుకుని అందులో రుబ్బిన ఉల్లిపాయ, టమోట ముద్ద, అల్లం వెల్లుల్లి పేస్టు, కారం, పసుపు, ఉప్పు , గరం మసాల, ధనియాల పొడి, కొబ్బరి పొడి, పెరుగు జీడిపప్పు పేస్టు కొంచెం వేసుకుని ఉడికించాలి. కొంచెం ఉడికి నూనె పైకి తేలిన తర్వాత ముందుగా తయారు చేసుకున్న అరటి కోఫ్తా బాల్స్‌ని అందులో వేసి పది నిమిషాలు ఉడికించి దించేయాలి.

- డి. మాధవి, మడికొండ, వరంగల్

క్యారెట్ -65

కావలసిన పదార్థాలు :
క్యారెట్ - 250గ్రా.,
మైదా - 50గ్రా., శనగపిండి - 50గ్రా., అల్లం వెల్లుల్లి - చెంచా, ఉప్పు - తగినంత, పెరుగు - కప్పు, పచ్చిమిరపకాయలు - 20గ్రా., కరివేపాకు - కట్ట
నూనె - వేయించడానికి సరిపడా, కారం - చెంచా, ఆరెంజ్ కలర్ - అర చెంచా.

తయారీ విధానం :
ం క్యారెట్‌ను శుభ్రం చేసి గుండ్రంగా చిన్న చిన్న చక్రాల్లా కోసుకోవాలి.
ం ఒక గిన్నెలో శనగపిండి, అల్లం వెల్లుల్లి ముద్ద, ఉప్పు, కారం, పెరుగు, ఆరెంజ్ కలర్‌ను కలిపి బజ్జీల పిండిలా తయారు చేసి పక్కన పెట్టుకోవాలి.
ం ఈ పిండిలో క్యారెట్ ముక్కలను ముంచి వేడి నూనెలో ఎర్రగా వేయించాలి.
ం ఇంకో బాణలిలో కొద్దిగా నూనె పోసి నిలువుగా చీల్చిన పచ్చి మిరపకాయలు, కరివేపాకు రెబ్బలను వేసి బాగా వేయించండి. ఇందులో వేయించిన క్యారెట్ ముక్కలు కలిపి మరో మూడు నిమిషాలు ఫ్రైచేయాలి.అంతే 'క్యారెట్ - 65' రెడీ.

- బి. మాధవి, రాజేశ్వరీ కాన్వెంటు దగ్గర, చాగల్లు, పశ్చిమగోదావరి జిల్లా

రాజస్థానీ సాంగో ఆలు

కావలసిన పదార్థాలు :
బంగాళ దుంప - 1, పెరుగు - 100గ్రా., సగ్గుబియ్యం - 50గ్రా., జీడిపప్పు పేస్ట్ - 25గ్రా., ఉల్లి ముద్ద - 10గ్రా., అల్లంవెల్లుల్లి పేస్ట్ - స్పూను, పచ్చిమిర్చి - 5(పేస్ట్ చేసుకోవాలి), దాల్చిన చెక్క - కొద్దిగా, జీలకర్ర - అర చెంచా, పసుపు - పావు స్పూను, ధనియాల పొడి - అరచెంచా, గరం మసాలా - అర చెంచా, కారం పొడి - అర చెంచా, ఉప్పు - తగినంత, నిమ్మరసం - రెండు చెంచాలు, నెయ్యి - 25గ్రా., ఎండు మిరపకాయలు - 2, కొత్తిమీర తురుము - చెంచా, పుదీనా తురుము - చెంచా, పచ్చి బఠానీ - అర కప్పు, పచ్చి కొబ్బరి - అర కప్పు నీరు - తగినంత, నూనె - తగినంత.

తయారీ విధానం :
బంగాళదుంప పై పొర తీసేసి కొద్దిసేపు నీళ్లలో ఉడికించాలి. తరువాత నూనెలో దోరగా వేయించి తీసి పక్కన పెట్టుకోవాలి. ఇప్పుడో బాణలిలో నెయ్యివేసి కాగిన తరువాత జీలకర్ర, దాల్చిన చెక్క వేసి దోరగా వేయించాలి. ఇవి వేగిన తరువాత ఉల్లిపాయ, పచ్చిమిర్చి, అల్లంవెల్లులి, పచ్చికొబ్బరి, నానబెట్టిన సగ్గుబియ్యం, పచ్చిబఠాని, మిర్చిపొడి, పసుపు, ధనియాల పొడి, గరం మసాలను వేసి సన్నని సెగపై రెండు నిమిషాలు ఉడికించాలి. అనంతరం జీడిపప్పు ముద్ద, పెరుగును అందులో వేసి మరో ఐదు నిమిషాలు ఉడికించాలి. తరువాత బంగాళదుంప వేసి మరో మూడు నిమిషాలు ఉడికించాక గ్లాసు నీళ్లు పోసి నిమ్మరసం వేసి సరిపడా ఉప్పుకూడా వేసుకోవాలి. దీంతో రాజస్థానీ సాంగో ఆలు తయారైనట్టే. పైన కొత్తిమీర, పుదీనా తురుము చల్లుకుంటే ఆకర్షణీయంగా ఉండడమే కాకుండా సువాసన వెదజల్లుతూ రుచిగా ఉంటుంది. పరోటా, రోటీ, పలావు, అన్నంతో కలిపి వేడివేడిగా తింటే మంచి రుచిగా ఉంటుంది.

- కె. శ్రీమాధవి, సాయినగర్, పొన్నూరు, గుంటూరు జిల్లా

కదంబ కూటు

కావలసిన పదార్థాలు : కాయగూరలు :
వంకాయలు - 50గ్రా,
అరటికాయ - 1,
బూడిద గుమ్మడి - 1 ముక్క,
గోరు చిక్కుడు - 50గ్రా,
బెంగళూరు వంకాయ - 1,
కందగడ్డ - 10గ్రా., కాకరకాయ - 1.
ఇతర వస్తువులు :
కందిపప్పు - 200గ్రా., శెనగపప్పు - 100గ్రా
మినప్పప్పు - 25గ్రా., ధనియాలు - 30 గ్రా., నూనె - రెండు చెంచాలు, పచ్చి బఠాని - 100గ్రా., ఇంగువ - చిటెకెడు, ఉప్పు - తగినంత, చింతపండు - 20గ్రా., పసుపు - చిటికెడు, ఎండు మిరపకాయలు - 5 గ్రా., పచ్చికొబ్బరి - అరకప్పు, కరివేపాకు - కొద్దిగా.

తయారీ విధానం :
ముందుగా కుక్కర్‌లో గ్లాసు కందిపప్పు, అరగ్లాసు శనగపప్పు విడిగా ఒక గిన్నెలో తగినన్ని నీళ్లుపోసి ఉంచాలి. దానిపై మరో గిన్నెలో పచ్చిబఠాని తగినన్ని నీళ్లుపోసి పెట్టి ఉడికించాలి. కూరగాయలను చిన్నచిన్న ముక్కలుగా కట్ చేసుకుని మరో గిన్నెలో వేసి తగినన్ని నీళ్లు పోసి ఉడి కించి పెట్టుకోవాలి. తరువాత ఓ బాణలిలో కొద్దిగా నూనె పోసి కాగిన తరువాత మిరపకాయలు, ధనియాలు, శెనగపప్పు, మినప్పుప్పు, ఇంగువ వేసి తక్కువ మంటపై దోరగా వేయించుకొని పక్కన పెట్టుకోవాలి. చింతపండును నీటిలో నానబెట్టుకుని ఉంచుకోవాలి. పచ్చికొబ్బరిని తురిమి పెట్టుకోవాలి. ఇప్పుడు వేయించి పెట్టిన వాటితో పాటు పచ్చికొబ్బరి తురమును మిక్సీలో వేసి కొద్దిగా నీరు పోసి మరీ మెత్తగా కాకుండా గ్రైండ్ చేసుకోవాలి. ఇప్పుడు మరో పెద్ద గిన్నె తీసుకుని ఉడికించిన పప్పులు, బఠాని, కాయగూరలను వేసి నాన పెట్టుకున్న చింతపండునుంచి గుజ్జును పిండి తగినంత ఉప్పు, పసుపు వేసి సన్నని మంటపై అడుగు అంటకుండా ఉడికించాలి. తరువాత అందులో నూరి పెట్టుకున్న మసాలను కలిపి గట్టి పడేంత వరకు ఉంచి దించేయాలి. మళ్లీ బాణలిలో కొద్దిగా నూనె వేసి ఆవాలు చిట్లగానే స్టౌ ఆర్పేసి కరివేపాకు వేసి వండి ఉంచిన 'కూటు'లో కలపాలి. అంతే 'కదంబకూటు' రెడీ అయినట్టే. వేడివేడి అన్నంలో నెయ్యితో దీనిని కలుపుకుని తింటే 'యమా టేస్టీ'గా ఉంటుంది. దీనిని ఇంకా దోసె, ఇడ్లీ, చపాతీలతో కూడా తినవచ్చు.

- వి. చంద్ర, ఎటపాక, భద్రాచలం, ఖమ్మం జిల్లా.

గోబీరాజ్ వాడి

కావలసిన పదార్థాలు :
శెనగపిండి - కప్పు
పెరుగు - 2 కప్పులు
జీలకర్ర - అర చెంచా
గరం మసాలా - చిటికెడు
కారం - చెంచా
ఉప్పు - తగినంత
నెయ్యి - 4 చెంచాలు

తయారీ విధానం :
శెనగపిండిలో తగినంత పెరుగు, చిటికెడు ఉప్పు కలిపి చిన్నచిన్న ముద్దలుగా చేసుకోవాలి. వాటిని ఆవిరికి ఉడికించి పక్కన పెట్టుకోవాలి. ఓ బాణలిలో నెయ్యి పోసి జీలకర్ర, ధనియాలు, పసుపు, గరం మసాలా, కారం, ఉప్పు, పెరగు వేసి కలపాలి. చిక్కదనం కోసం రెండు చెంచాల శనగపిండిలో కొద్దిగా నీళ్లు కలిపి, దానిని పెరుగు మిశ్రమానికి కలపాలి. చివరగా కరివేపాకుతో గార్నిష్ చేసుకుంటే 'గోబీరాజ్ వాడి' రెడీ అయినట్టే!

- వూర విజయలక్ష్మి, కనుపర్తి, ప్రకాశం జిల్లా

బచ్చలి - నువ్వుల కూర

కావలసిన పదార్థాలు :
బచ్చలి కూర - 2 కట్టలు
పచ్చిమిర్చి - 5
నువ్వులు - 100గ్రా
శెనగపప్పు - 2 చెంచాలు
మినప్పప్పు - 2 చెంచాలు
ఆవాలు - పావు చెంచా
జీలకర్ర - పావు చెంచా
కరివేపాకు - రెండు రెబ్బలు
వెల్లుల్లి పాయలు - రెండు
వేరెసెనగ గుళ్లు - 50గ్రా
ఇంగువ - చిటికెడు
పసుపు - చిటికెడు
ఉప్పు - సరిపడా
నూనె - చిన్న కప్పు
ఎండు మిర్చి - 6
చింతపండు రసం - సరిపడా
కారం - చెంచా
కొత్తిమీర - కొద్దిగా

తయారీ విధానం :
ముందుగా బచ్చలి కూరను కడిగి శుభ్రం చేసుకున్న తర్వాత కోసుకోవాలి. తర్వాత ఒక పాత్రలో నూనె వేసి ఎండు మిరపకాయలు, ఆవాలు, జీలకర్ర, శెనగపప్పు, మినప్పప్పు, వేరుసెనగగుళ్లు వేసి వేయించాలి. ఇవి కొంచెం వేగిన తర్వాత కరివేపాకు, పచ్చిమిర్చి ముక్కలు, ఇంగువ వేసి మరికొంచెం సేపు వేయించాలి. తరిగి పెట్టుకున్న బచ్చలి కూరని పోపులో వేసి కలిపి పసుపు, ఉప్పు వేసి ఒక గ్లాసు నీరు పోసి మూత పెట్టి ఉంచాలి. ఇప్పుడు నువ్వులను పొడిగా వేయించి చల్లారాక వెల్లుల్లి రెబ్బలు, నువ్వుల పప్పును గ్రైండ్ చేసి పెట్టుకోవాలి. ఉడుకుతున్న బచ్చలిలో కొద్దిగా చింతపండు రసం వేసి కలపాలి. తర్వాత అందులో నువ్వుల పొడి, కారం వేసి మరో పది నిమిషాలు ఉంచి దించెయ్యాలి. దీన్ని కొత్తిమీరతో గార్నిష్ చేసుకోవాలి. ఇది అన్నం, చపాతీల్లోకి భలే బాగుంటుంది.

- ఎస్. వెంకటరత్నం, శంకవారి వీధి, మండపేట, తూర్పుగోదావరి జిల్లా

వెజిటబుల్ జాల్ ఫ్రైజి

కావలసిన పదార్థాలు :
క్యాబేజి - చిన్నది, బీన్స్ - 10, క్యారెట్ - 1, క్యాప్సికం - 1, ఉల్లిపాయ - 1, పచ్చిమిర్చి - 3.
గ్రైండ్ చేయడానికి : ఉల్లిపాయలు -2, వెల్లుల్లి - 6 రెబ్బలు, అల్లం - చెంచా
గ్రేవీ కోసం : నూనె - రెండు చెంచాలు, కారం - రెండు చెంచాలు, ధనియాల పొడి - చెంచా, జీలకర్ర పొడి - చెంచా, పసుపు - అరచెంచా, గరం మసాల - అర చెంచా, మీగడ - అర కప్పు, ఉప్పు, పంచదార - తగినంత, టమోట సాస్ - నాలుగు చెంచాలు.

తయారీ విధానం :
క్యాబేజీ, బీన్స్, క్యారెట్, క్యాప్సికమ్‌లను సన్నగా, పొడుగ్గా కట్ చేసుకోవాలి. తరువాత ఓ పాత్రలో వీటిని ఉడకబెట్టి పక్కనపెట్టుకోవాలి. ఉల్పిపాయలు, పచ్చిమిర్చిలను కూడా సన్నగా, పొడుగ్గా కట్ చేసుకుని పెట్టుకోవాలి. అలాగే గ్రైండ్ చేయాల్సిన సామగ్రిని కూడా సన్నగా గ్రైండ్ చేసుకోవాలి. ఇప్పుడు ఓ పాత్రలో నూనె పోసి వేడెక్కిన తరువాత గ్రైండ్ చేసిన మసాలాను వేయించుకోవాలి. అందులో నూనె పైకి వచ్చినట్టు అనిపించగానే పొడుగ్గా తరిగి ఉంచుకున్న ఉల్లిపాయ, పచ్చిమిర్చిముక్కలను వేసి కొంచెం వేయించాలి. అనంతరం కారం, ధనియాల పొడి, జీలకర్ర పొడి, పసుపు, మీగడ, గరం మసాలా, ఉప్పు, పంచదార వేసి మళ్లీ కొంచెం సేపు వేగనివ్వాలి. చివరికి ఇందులో ఉడకబెట్టిన కూరగాయలు, టమోట సాస్ వేసి ఐదు నిమిషాలు ఉడకనివ్వాలి. అంతే జాల్‌ఫైజి రెడీ అయినట్టే. దీన్ని ప్లేటుల్లోకి చేర్చి గార్నిష్ చేసి వేడివేడిగా సర్వ్ చేస్తే సరి.

- మధులత, లక్ష్మీ అపార్ట్‌మెంట్స్, బోధన్, నిజామాబాద్ జిల్లా

హెర్బల్ స్ప్రౌట్స్ కర్రీ

కావలసిన పదార్థాలు :
మనకు కావాల్సిన క్వాంటిటీని బట్టి పెసలు, అలసందలు, శనగలు, బఠానీలను నానబెట్టి మొలకలు చేయాలి. పచ్చిమిర్చి, టమోట, ఉల్లిపాయ, వెల్లుల్లి, మెంతికూర, ఉప్పు, తులసి ఆకులు, పసుపును సరిగ్గా ఉపయోగించాలి.

తయారీ విధానం :
మొక్కలు వచ్చిన పెసలు, అలసందలు, శనగలు, బఠానీలను కుక్కర్‌లో వేసి రెండు విజిల్స్ వచ్చేవరకు ఉడకబెట్టిలి. తర్వాత పచ్చిమిర్చి, టమోట, ఉల్లిపాయ, మెంతికూర, ఉప్పు, నీళ్లు పోసి పది నిమిషాలు ఉడకబెట్టి పేస్ట్ చేయాలి. తర్వాత పోపు వేసి అందులో తులసి ఆకులు, ఉల్లిపాయలు వేయాలి. ఇప్పుడు ఉడికించి పెట్టుకున్న మొలకలను ఆ పేస్టులో వేసి కలపాలి. దీంతో హెర్బల్ స్ప్రౌట్స్ కర్రీ రెడీ అయినట్టే. ఇది చపాతీ, పూరీల్లోకి భలే బావుంటుంది.

- కె. శాంతమ్మ, అమన్‌గల్, మహబూబ్‌నగర్ జిల్లా

తీపి కాకరకాయ కూర

కావలసిన పదార్థాలు :
కాకారకాయలు - కేజీ
ఉల్లిపాయలు - రెండు
నూనె - ఒక కప్పు
పచ్చిమిరపకాయల కారం - రెండు చెంచాలు
ఎండు కొబ్బరి - 3చెంచాలు
ఆవాలు, జీలకర్ర - చెంచా
పెరుగు - అర కప్పు
పాలు - అరకప్పు
పసుపు - చిటికెడు
పంచదార - చెంచా

తయారీ విధానం :
ముందుగా కాకరకాయలు, ఉల్లిపాయలను సన్నగా తరిగి పక్కన పెట్టుకోవాలి. తరువాత ఓ బాణలిలో నూనె వేసి కాగిన తరువాత ఆవాలు, జీరకర్ర వేసి కాస్త వేయించాలి. ఇప్పుడు ఇందులో తరిగి పెట్టుకున్న కాకరకాయ ముక్కలను వేయాలి. అవి దోరగా వేగిన తరువాత ఉల్లిపాయలను కూడ వే యాలి. ఉల్లిపాయలు బాగా వేగిన తరువాత పచ్చిమిరపకాయల కారం వేసి, వేగాక అందులో పాలు, పెరుగు పోసి బాగా కలపాలి. ఐదు నిమిషాల తరువాత ఎండు కొబ్బరి, పసుపు వేయాలి. కూర దగ్గరగా వచ్చాక చక్కెర వేస్తే 'తీపి కాకరకాయ కూర' రెడీ అయినట్టే! ఇది అన్నంలోకి భలే రుచిగా ఉంటుంది.

-హెచ్. శైలజ, హిందూపూర్

* గాజు పాత్రలు లేదా గ్లాసులు ఒకదానిలో మరొకటి ఇరుక్కుపోయినప్పుడు లోపలిదానిలో చల్లటి నీళ్లు పోసి రెండిటినీ కాస్త వేడి నీటిలో దింపాలి. వెంటనే ఊడి వస్తాయి.

* ఉల్లిపాయల దగ్గరగా ఉంచితే బంగాళదుంపలు త్వరగా చెడిపోతాయి.

* కేకులో కోడిగుడ్డు వాసన రాకుండా ఉండాలంటే కేకు మిశ్రమానికి ఒక చెంచా తేనె కలిపితేసరి.

* కొంచెం నీళ్లకు వెనిగర్ లేదా నిమ్మకాయ చెక్కను కలిపి మరిగించి ఆ నీళ్లతో రుద్దితే అల్యూమినియం పాత్రలు తెల్లగా మెరిసిపోతాయి.

* భారతదేశంలో ప్రచురితమైన మొదటి వంటల పుస్తకం 'ద షెఫ్'. అది కేవలం గోవా వంటకాల గురించేనని పొరబడుతుంటారుగానీ, ఆ పుస్తకం మంగుళూరు ప్రాంత రుచులను పరిచయం చేస్తుంది.

Thursday, 23 May 2013 06:18

Tomato Chutney, Recipe of Tomato Chutney

కావలసిన పదార్థాలు: పచ్చి టమోటాలు - పావుకేజి, నల్ల / తెల్ల నువ్వులు (వేగించినవి) - 100 గ్రా., పచ్చిమిర్చి - 4, వెల్లుల్లి - 6 రేకలు, జీలకర్ర - 1 టీ స్పూను, చింతపండు - 2 రెబ్బలు, నూనె - 1 టేబుల్ స్పూను.

తయారుచేసే విధానం: కడాయిలో నూనె వేసి పచ్చిమిర్చి, వెల్లుల్లి, జీలకర్రను వేగించి తీసేయాలి. మిగిలిన నూనెలో (నాలుగు ముక్కలుగా) తరిగిన టమోటా కాయల్ని వేసి మగ్గనివ్వాలి. టమోటాలు దించేసి, చల్లారిన తర్వాత మిక్సీలో నువ్వులు + జీలకర్ర, పచ్చిమిర్చి+ వెల్లుల్లి +చింతపండు (స్పూను నీటిలో నానబెట్టి ఉంచుకోవాలి), టమోటా ముక్కలు ఒకదాని తర్వాత ఒకటి వేసి ఉప్పు జతచేసి గ్రైండ్ చేసుకోవాలి. వేడివేడి అన్నంతో ఈ పచ్చడి చాలా రుచిగా ఉంటుంది.

Thursday, 23 May 2013 06:18

టొమాటో రైస్‌:-
కావలసినవి:

బియ్యం: అరకిలో, జీలకర్ర: టేబుల్‌స్పూను, ఆవాలు: టీస్పూను, ఉల్లిపాయ: ఒకటి, టొమాటోముక్కలు: 2 కప్పులు, కరివేపాకు: కట్ట, పచ్చిమిర్చి: మూడు, గరంమసాలా: అరటీస్పూను, కారం: అరటీస్పూను, కొత్తిమీర: కట్ట, పసుపు: చిటికెడు, నూనె: పావుకప్పు, వేడినీళ్లు: ఒకటింపావు లీటరు, ఉప్పు: తగినంత.

తయారుచేసే విధానం
* బియ్యం కడిగి వేడినీళ్లలో 15 నిమిషాలు నాననివ్వాలి.
* మందపాటి బాణలి తీసుకుని నూనె లేదా నెయ్యి లేదా వెన్న వేసి జీలకర్ర, ఆవాలు, పచ్చిమిర్చి, కరివేపాకు వేసి వేయించాలి. తరవాత తరిగిన ఉల్లిముక్కలు కూడా వేసి మరికాసేపు వేయించాలి. టొమాటోముక్కలు కూడా వేసి ఓ రెండు నిమిషాలు వేయించాలి.
* బియ్యం కూడా వేసి మరో అరనిమిషం వేయించాలి. తరవాత జీరా రైస్‌లో మాదిరిగానే బియ్యంకొలతకి రెట్టింపు అంటే సుమారు లీటరు పైగా నీళ్లు పోసి తగినంత ఉప్పు వేయాలి.
* అన్నం మూడువంతులు ఉడికిన తరవాత కొత్తిమీర కూడా వేసి మంటతగ్గించి మూతపెట్టి ఉడికించాలి. మూడు నిమిషాల తరవాత అన్నం ఉడికిందో లేదో చూశాక దించాలి.