26న ఏమాయ చేసావె

సూపర్‌స్టార్‌ కృష్ణ సమర్పణలో ఇందిరా ప్రొడక్షన్స్‌ పతాకంపై మహేష్‌బాబు సోదరి మంజుల భర్త సంజయ్‌ స్వరూప్‌ నిర్మిస్తున్న ప్రతిష్టాత్మక చిత్రం ‘ఏమాయ చేసావె’ అన్ని కార్యక్రమాలు పూర్తి చేసుకుని ఈనెల 26న విడుదలకు సిద్ధమవుతోంది. అక్కినేని నాగచైతన్య నటిస్తున్న ఈ రెండవ చిత్రానికి ‘ఘర్షణ’ ఫేం గౌతమ్‌ వాసుదేవ మీనన్‌ దర్శకత్వం వహిస్తుండగా.. సమంతా హీరోయిన్‌గా నటిస్తోంది. ఇక ఈ చిత్రానికి ఆస్కార్‌ అవార్డ్‌ గ్రహీత ఏ.ఆర్‌.రెహమాన్‌ సంగీతాన్ని సమకూర్చడం తెలిసిందే. అనంత్‌శ్రీరాం సాహిత్యాన్ని అందించిన ఈ చిత్రానికి ఉమర్జీ అనురాధ సంభాషణలు రాసారు.

ఈ చిత్రం ఆడియో ఇప్పటికే చాలా పెద్ద విజయం సాధిస్తూ.. చిత్రంపై అంచనాలను మరింత పెంచిందని.. ఆ అంచనాలకు ఏమాత్రం తీసిపోనివిధంగా గౌతమ్‌ ఈ చిత్రాన్ని అత్యద్భుతంగా రూపొందించారని నిర్మాత సంజయ్‌ స్వరూప్‌ ఆనందాన్ని వ్యక్తం చేస్తున్నారు. ఈ చిత్రంలో సంజయ్‌ స్వరూప్‌ కూడా ఓ ముఖ్యపాత్ర పోషించడం విశేషం. హీరో నాగచైతన్య మాట్లాడుతూ ‘‘నా రెండో చిత్రానికి ఆస్కార్‌ విజేత రెహమాన్‌ సంగీతాన్ని అందించడం చాలా గర్వంగా ఉంది. ఈ మధ్యకాలంలో నేను ఎవరికి ఫోను చేసినా..‘ఏమాయ చేసావె’ గీతాలే రింగ్‌టోన్స్‌గా వినిపిస్తుండడం ఈ చిత్రం సాధించబోయే సంచలన విజయంపై మరింత నమ్మకాన్ని పెంచుతోంది’ అన్నారు.